SonicWall предупредува за непоправени ранливости во GMS-софтверот на кој му е истечен рокот на поддршка

SonicWall ги предупреди своите корисници за две безбедносни ранливости кои влијаат на Global Management System (GMS), софтвер на кој му е истечен рокот на поддршка и за кој нема да бидат објавени безбедносни закрпи.

Global Management System (GMS) им овозможува на ИТ-администраторите да распоредуваат и управуваат со илјадници безбедносни уреди на SonicWall преку еден интерфејс. Сепак, SonicWall официјално го замени со платформата за управување Network Security Manager (NSM).

Двете ранливости биле откриени и пријавени од безбедносни истражувачи од Pentest-Tools и влијаат на системите што користат SonicWall GMS 9.5.2 и постари верзии.

Првата ранливост во GMS, објавена оваа недела, е означена како CVE-2026-109593 и им овозможува на напаѓачите без автентикација, кои имаат мрежен пристап до ранливите инстанци (со GMS 9.5.2 и постари верзии), да украдат чувствителни информации преку читање на интерни датотеки.

SonicWall предупреди и за втора безбедносна ранливост (CVE-2026-109594), која може да им овозможи на напаѓачите со високи привилегии да пристапат до информациите зачувани во GMS-базата на податоци или да ги изменат преку SQL Injection напади со ниско ниво на сложеност.

Во вторникот, SonicWall дополнително ги повика корисниците да преминат на NSM, бидејќи нема да објави безбедносни закрпи за ранливостите, со оглед на тоа што засегнатите системи веќе го достигнале крајот на својот животен циклус (End of Life – EOL).

„Засегнатиот производ го достигна крајот на својот животен циклус (EOL). Како резултат на тоа, нема да бидат објавени поправки или безбедносни ажурирања за овие ранливости“, предупреди SonicWall во вторникот.

„Организациите што го користат овој производ треба да бидат свесни за поврзаните безбедносни ризици и силно им се препорачува да преминат на SonicWall Network Security Manager (NSM).“

Напаѓачите често ги таргетираат ранливостите во производите на SonicWall и од почетокот на годината искористиле повеќе од нив во zero-day напади.

Во февруари, SonicWall ги повика корисниците да применат безбедносни закрпи за две zero-day ранливости во SMA1000 (CVE-2026-15409 и CVE-2026-15410), а во јули беа објавени информации за уште два напади со нивно искористување. Компанијата исто така поправи три други ранливости во SMA1000 кои биле искористувани како zero-day пропусти во септември (CVE-2026-83548 и CVE-2026-83549) и октомври (CVE-2026-102255).

Во изминатите четири години, американската Агенција за сајбер-безбедност и инфраструктурна безбедност (CISA) додаде 19 ранливости на SonicWall во својот каталог на активно искористувани безбедносни пропусти. Од нив, 13 биле злоупотребувани и од ransomware-групи.

SonicWall опслужува повеќе од 500.000 корисници, меѓу кои мали и средни бизниси, големи компании и владини институции, во повеќе од 215 земји и територии, преку мрежа од над 17.000 партнери.

Извори:

• Bleeping Computer – SonicWall warns of unpatched flaws in end-of-life GMS software Bleeping Computer